چیرۆکا پەروەردەیى یا وێنەدار د گۆڤارا (سڤورە)دا ل سالا( ٢٠٠٨ )ێ (خواندنەک بۆ رەگەز و بنەمایێن وێ یێن هونەرى) ڤەکولینەکا هەڤپشک
Keywords:
چیرۆكا زارۆكان، چیرۆكا زارۆكان یا وێنەدار، رەگەزێن هونەرى، بنەمايێن چیرۆكا وێنەدار، پەروەردە و رەوشتAbstract
ئەڤ ڤەکولینە هەوڵدانەکە، بۆ دیارکرنا بنەمایێن هونەرى د چیرۆکا زارۆکان یا وێنەداردا، بۆ ڤێ مەبەستێ چەند هژمارەک ژ چیرۆکێن وێنەدار دگوڤارا سڤورەدا هاتینە وەرگرتن. ب شێوەیەکێ گشتى چیرۆکا زارۆکان و یا وێنەدار ب تایبەتى، رولەکێ سەرەکى و گرنگ د پەروەردە و بەرفەرەهکرن و گەشەپێدانا هزر و بیردانکا زارۆکاندا دگێریت، دبیتە ئەگەرێ ژ بۆ پەیداکرن و چەسپاندنا بنەما و بهایێن ژ هەژى و بلند و کویر د هزر و ئاشۆپا واندا، ژ پیخەمەت ئاڤاکرنا زارۆکەکێ ساخلەم و ئارام ژ لایێ هزرى، دەروونى، جڤاکى، پەروەردەیى، شارستانى، رەوشتى، لێزانێن زمانى، ئایینى، رەوشەنبیریڤە. چیرۆکا وێنەدار دروستکرنا وێنە و پەیڤانە، ئەوێن رویدانەکی یان بابەتەکی درامى یان هزرەکێ دگەهینن، واتە ئەڤ جۆرێ چیرۆکان ژ تێکستێن نڤیسى و تێکستێن وێنەدار پێکدهێن، کو ب هەردوو شێوازێن پەناڵ ئانکو وەرگرتنا ئاخفتنێ د شێوێ چوارگوشەیەکێ یان لاکێشەیەکێ و شێوازێ پڤدانک، بۆ ئاماژەکرن ب ئاخفتن و دەڕبرینێن کەسایەتییان دهێتە بکارئینان. ل ڤێرە دوو جورێن سەرەکى ژ ئەڤان چیرۆکان هەنە، ئەو ژى ئەوێن زێدەتر پشتبەستنێ ب وێنەیان دکەن ژ نڤێسینێ، واتە وێنە لسەر واتایا چیرۆکێ و مەبەستا وی یا زاڵە. ئانكو چێدبیت د ئەڤێ چیرۆکێدا ب ئێکجارى تێکستێن نڤیسى دیار نەبن، چونکە وێنەیان شیانێن دەربڕینێ ل جهێ تێکستان هەنە. جۆرێ دى ژى ئەوە یێ کو د ئەڤێ ڤەکولینێدا هاتیە پراكتيكرن، کو وێنە و تێکستێن نڤیىينه، ئەڤ هەردوو شێوە ب هەڤسەنگى ڕویدان و ئارمانجا چیرۆکێ دگەهینن. ل دوماهيێ خويا دبيت چەوانیا بەرجەستەکرن و پێکڤە گرێدانا بنەمایێن هونەریێن چیرۆکێ و ڕادێ گونجاندنا وان ل گەل ئارمانج و مەبەستێن دیارکرى یێن چیرۆکێ، رولەکێ گرنگ د چیرۆکا زارۆکاندا ب گشتى و یا وێنەدار ب تایبەتى دگێریت.
