وەرگێرانا ئەدەبی و دووبارە ئاڤاكرنا تێكستێ رەسەن د زمانێ ئارمانجدا
Keywords:
تێكست، وەرگێر، وەرگێرانا ئەدەبی، داهێنانAbstract
وەرگێران ب مەرەما گەهاندنا هەمان نامەیا گۆتن و نڤیسنێ هاتیە هەبوونێ، ب درێژیا دیرۆكێ چاوانیا باشتر گەهاندنا وێ نامێ كەفتییە بەر بووچون و ڤەكولینێن جودا. كومەكا بووچونا ئالیگریا وەرگێرانا پەیڤ ب پەیڤ دكر، د باشترگەهاندنا وێ پەیامێدا، دگوتن: د ڕۆخسار و نیشانێن پەیڤاندا نهێنیێن خودایی هەنە، لەوما نابت هیچ پەیڤەك د تێكستێ زمانێ ڕەسەندا بمینت و نەهێتە وەرگێران، دوور ژ هندێ تێكستێ زمانێ ئارمانج ب چ ڕەنگ و دارێتن بهێتە هەبوونێ. بەشەكێ دن ئالیگریا وەرگێرانا ڕامان و گەوهەرێ ناڤەرۆكێ ب ڕێیا بەرامبەركرنا ڕامانێ د وەرگێرانێدا دكر، لگەل بەرچاڤگرتنا سرۆشتێ زمانێ بۆ دهێتە وەرگێران. ئەڤێ قایشكێشانێ ب سەدان سالا ڤەكێشا هەتاكو وەرگێران بوویە زانستەكێ سەربەخۆ و رێ و رێبازێن جودا بۆ باشتر وەرگێرانا مەبەستێن تێكستێ رەسەن پەیدابووین. هەر لسەر ئەڤی بنەمای و هەبوونا ئەوان رێبازێن جودا یێن د زانستێ وەرگێرانێدا هاتین، پێدڤییە نە ب تنێ وەرگێران بهێتەكرن، بەلكو د ڕێیا وێدا دووبارە ئاڤاكرن و داهێنان بهێتە ئەنجامدان، ئەو داهێنان د رێیا رێبازا ئازاد و وەرگێرێ وێرەكدا دهێتە كرن، واتە دوور ژ هژمارتن و پیڤانا پەیڤان تێكستێ وەرگێرای بهێتە خومالیكرن، ئەو خومالیكرن ب تنێ ب زانینا زمانی ڕەسەن و ئارمانج ناهێتەكرن، بەلكو ب هەبوونا بەهرەیەكا هونەری یا وەرگێرانێ ئەوا خۆ د زێدەكرن و كورتكرن و بەرامبەركرنا ڕامانێ و جوانكرنا فورمیدا دبینت.
