به‌رجه‌سته‌بوونا ململانەیا دڕامايى د حه‌يرانۆكا كورديدا – ب نموونه‌يا جورێن هه‌بوونا هێزێن هه‌ڤدژ: مرۆڤ دژى خۆ و مرۆڤ دژى جڤاكى –

الملخص

د ناڤا جورێن جیاوازێن فۆلکلۆرێ کوردیدا، حەیرانۆک وەکو جورەکێ گرنگ، خویاکەرا ژین و ژیار، داب و نەریت و هەڤڕکییا مرۆڤێ کوردە – ب تایبەتی کوڕ و کچێن کورد کو کارەکتەرێن سەرەکییێن حەیرانۆکانە – . هەلبەت فۆلکلۆری پەیوەندییا ب جور و ژانرێن دیترێن ئەدەبیڤە – د ناڤا ئەواندا ژی دڕامایێ – هەیە و ژ بەر کو فۆلکلۆر ب گشتی خودان گەلەك ساخلەت و تایبەتمەندییێن دڕاماییە، د شیاندا هەیە بەرجەستەبوونا پڕانییا توخم و تەكنیكێن دڕامایی تێدا دەستنیشان بكەین. ژ بەر ئەوێ پەیوەندییا بهێزا کو حەیرانۆکێ ب ژیانا جڤاکییا کوردیڤە هەی، زۆربەیا حەیرانۆکان هەلگرێن جورە ململانەکا مرۆڤێ کورد، لگەل بیاڤ و هێزێن جوراوجورێن جڤاکینە. سروشتێ‌ دڕاماتیكییێ‌ حەیرانۆکان ژی، ڕێکخۆشکەرە ژ بۆ‌ ئەوێ‌ چەندێ‌ کو ڤەكۆلەر بشێین وەكو پارچە دەقێن دڕامایی، سەرەدەرییێ‌ لگەل بكەین. ب تایبەتی ژی، تەکنیکێن دیالۆگ و مۆنۆلۆگ و توخمێن کارەکتەر و ململانەیا دڕامایی، كو گەلەك بهێزی د حەیرانۆکاندا بەرجەستە و خویا دبن، کو ل ڤێرێ مە توخمێ ململانەیا دڕامایی بۆ لێکۆلینکرنێ هەلبژارتییە و دێ لسەر حەیرانۆکان پڕاکتیک کەین. ململانەیا دڕامایی ل دویڤ سروشت، چەمك و ڕەوشا خۆ، دابەشی لسەر چەندین جوران دبیت، مینا: (جورێ‌ تێگەهێ‌ ململانەیێ‌ یێ‌ بەرجەستە، جورێ‌ چۆنیەتییا ململانەیێ‌ و جورێ‌ هەبوونا هێزا هەڤدژ). مە ژی جورێ‌ ''هەبوونا هێزا هەڤدژ'' هەلبژارتییە؛ چونكی ئەڤ جورێ‌ ململانەیا دڕامایی، پتر ژ جورێن دیتر، لگەل سروشت و ناڤەڕۆكا حەیرانۆکاندا دگونجیت. هەر ژ بەر ئەڤێ چەندێ ژی، مە كەرەستێ‌ ڤەكۆلینا خۆ ژ جورێ فۆلکلۆرییی حەیرانۆکان و ل ژێر ناڤونیشانێ‌ ''بەرجەستەبوونا ململانەیا دڕامایی د حەیرانۆکا کوردیدا ــ ب نموونەیا جورێن هەبوونا هێزا هەڤدژ: مرۆڤ دژی خۆ و مرۆڤ دژی جڤاکی ــ ''، هەلبژارت.